Mazmuny
Halıazıon – qabaqtyń aýrýy, meıbomı beziniń shyǵý kanalynyń bitelýimen sıpattalady.
Kóz – sfera tárizdi kórý aǵzasy. Ol suıyqtyqqa toly. Aqqabyqtan, móldirqabyqtan turatyn kózdiń syrtqy qabaty qorǵanys qyzmetin atqarady. Kózdiń ortańǵy qabaty tamyrlardan turady. Ishki qabaty (torqabyq) nervterden jáne jaryq-túske sezimtal jalǵamdardan turady. Sondaı-aq, móldirqabyqtyń artynda ornalasqan nurly qabyq bar, ol –juqa qozǵalmaly plastına, ortasynda qarashyq atalatyn dóńgelek oıyǵy bar. Onyń artynda qaraq (kóz burshaǵy) ornalasqan, ol – lınza túrindegi móldir sozylmaly dene, onyń basty qyzmeti – jaryqty syndyrý. Konıýnktıva – qabaqtyń ishki bóligin jaýyp turatyn silemeı qabyǵy.
Halıazıon meıbomı bezderiniń biriniń shyǵý joly bitelgende paıda bolady. Bul bezder qabaqtyń shetinde kirpiktiń astynda ornalasqan; olar kózdi shaıatyn maıly suıyqtyqty óndiredi.
Halıazıon kóbinese, teriskennen (ishki gordeolýmnan) keıin paıda bolady. Bul kezde ádette, qabaq qyzaryp, isinip, ystyq bolady. Keıde teriskenniń saldarynan bez bosatylmaıdy, biraq, qyzarý jáne isik basylady. Bez qabaqtaǵy myqty, serpimdi túıinge aınalady, bul halıazıon atalady.
Qabaqty qaraý dıagnozdy naqtylaıdy.
Sırek jaǵdaıda teriniń qaterli isigi halıazıon sekildi kórinedi. Eger mundaı kúdikter bolsa, bıopsııa qajet bolady.
Emdeý
Halıazıon kóbinese, bir aıǵa jýyq ýaqyt ishinde emdeýsiz ótedi.
- Emdeýde qabaqqa kúnine tórt ret, 10-15 mınýttan jyly kompress qoıylady. Ystyq emes sýdy qoldaný qajet. Bul bezdiń kanaldy bitegen qataıǵan bólindisin jibitedi jáne bosatylýyna kómektesedi, sondyqtan saýyǵýǵa aparady.
- Halıazıondy basýǵa tyryspańyz.
Eger halıazıonnyń ólshemi ulǵaısa, ony hırýrgııalyq jolmen alyp tastaý qajet. Tilik teride tyrtyq bolmas úshin, kóbinese, qabaqtyń ishki jaǵynan jasalady.
Inektsııalyq steroıdtyq preparattar – emdeýdiń basqa nusqasy.
Halıazıon, ádette, ózdiginshe jazylady. Emdeý oń nátıje beredi.
Halıazıon ózdiginshe jazylǵanmen, qabaqta tyrtyq qalady. Bul másele kóbinese, halıazıondy operatıvtik emdeýde kezdesedi, biraq, sırek bolady. Birneshe kirpikten aıyrylý, nemese qabaqtyń shetinde shaǵyn naýashyq qalýy múmkin. Jıi kezdesetin asqynýy – aýrýdyń qaıtalanýy.
Emdeýge qaramastan, qabaqtaǵy túıin ósetin bolsa, nemese kirpik joǵaltylǵan bólik bar bolsa, dárigerge kóriný qajet.
Halıazıonnyń nemese teriskenniń aldyn alý úshin qabaqqa jáne kirpik ósetin syzyqqa túnge qaraı jumsaq skrabty (óńezdi joıatyn qural) jaǵý kómektesedi. Kózdi tazartý úshin arnaıy gýbkany (spondjdy), ezilgen balalar sýsabynyn qoldaný qajet.
Tazalaǵannan keıin dáriger taǵaıyndaǵan antıobıtigi bar jaqpa maıdy qoldaný qajet.
Meıbomı beziniń lıpogranýlemasy.
Aqparat kózi: AQSh Ulttyq densaýlyq ınstıtýttarynyń málimetter qory: http://www.nlm.nih.gov/medlineplus/ency/article/001006.htm
Aýdarmashy: Asel Stambekova, HealthSity jobasynyń derbes úılestirýshisi
Redaktsııalyq alqa:
Almaz Sharman, medıtsına professory
Lázat Aqtaeva, m.ǵ.d.
Sálim Smaıylov, b.ǵ.k.